Design
March 25

Сцяг мой вольны, сцяг мой смелы!

Гэты тэкст не столькі пра прыгажосць, гісторыю, сімвалізм, колькі пра практычнасць бел-чырвона-белага сцяга. Паглядзім на сцяг як на брэнд, і зразумеем чаму ён геніяльны.

Сцяг мой просты

Большасць бел-чырвона-белых сцягоў на дэманстрацыяй і мітынгах няправільныя. Правільны беларускі сцяг гэта палотнішча памерамі 1:2, з трох роўных гарызантальных палос — дзвюх белых і адной чырвонай між імі

Але паколькі друкуюцца сцягі ў розных друкарнях, ці нават робяцца самастойна, то і прапорцыі, і адценне чырвонага змяняецца ад сцягу да сцягу. Тым не менш, мы цудоўна разумеем, што гэта беларускі сцяг.

Марш да Дня Волі ў Варшаве. Фота: Каардынацыйная рада / Facebook

Каб брэнд працаваў дастаткова дзвюх умоў:

  1. Гэта нешта пра Беларусь
  2. Дзве белыя паласы і чырвоная між імі.

Больш за тое, сцяг можа быць нават не бел-чырвона-белым, але счытвацца.

Уладзімі Цэслер «БЧБ»

Сцяг мой гнуткі

Геніяльная прастата адкрывае надзвычайныя магчымасці для айдэнтыкі. Айдэнтыка можа быць прыменена для любога носьбіта, і яна будзе працаваць.

Дастаткова ўспомніць легендарныя шкарпэткі, дзе прапорцыі белага вельмі залежаць ад абутку, але нават з няправільнымі прапорцыямі зразумела, які мэсэдж даносіць той, хто іх надзеў.

І гэта працуе не толькі са шкарпэткамі.

Вопратка брэнду Znivien

Наўрад Дуж-Душэўскі закладаў гібкую графічную сістэму, калі праектаваў сцяг, але праз геніяльную прастату, яна атрымалася. Доказам служаць сцягі раёнаў ды іншых мясцовасцяў, якія выкарыстоўваюць агульную бел-чырвона-белую схему, але ствараюць унікальны сімвал на яе базе.

Сцягі раёнаў flags.dze.chat

Бел-чырвона-белая схема працуе не толькі для сцягоў, выкарыстоўваючы яе можна любы элемент ілюстрацыі зрабіць беларускім.

Андрій Єрмоленко / Неназваны аўтар / Уладзімір Маляўка

Нават у манахромным варыянце, напрыклад, у чорна-белых ілюстрацыяй ці вайсковых шаўронах, брэнд працуе цудоўна.

Вокладка часопіса Маланка №9, 1926 г. / Тактычная нашыўкі на ліпе ад Vyraj.pl

Карацей, беларускі сцяг дае шмат магчымасцяў зрабіць нешта па-беларуску. Трэба запакаваць дарунак па-наску? Шырокая чырвоная стужка і белая каробка ці канверт зробяць гэтую справу ідэальна. Паставіць знічы на магілку ці помнік значнага беларуска дзеяча: два белых, і адзін чырвоны па цэнтру. Брэндынг для беларускай справы: тры элементы, аднолькавыя па баках, адрозны па цэнтру.

Можна выкарыстоўваць дзе хочаш, ад архітэктуры да інтэрфейсаў.

Сцяг мой?

Канешне, праз такую прастату, губляецца ўнікальнасць. Калі на фотаздымку са стадыёна бачна сотні БЧБ-сцягоў, то хутчэй за ўсё гэта не сход БНФ, а футбольныя фанаты River Plate.

https://youtu.be/bzaSGSsWdgg

Бел-чырвона-белыя сцягі сустракаюцца ў розных тэрытарыяльных адзінках. Сцяг муніцыпалітэта Понга ў складзе аўтаномнай супольнасці Астурыя Іспаніі нават мае Пагоню.

Белы і чырвоны настолькі распаўсюджаныя, што па хэштэгу #бачусцяг у сацыяльных медыя можна знайсці шмат выпадковых спалучэнняў бел-чырвона-белага, хаця аўтары не закладалі нічога беларускага.

Заплечнікі брэнду Guess / Берлінскае метро

Калі першае не страшна праз розныя арыялы выкарыстання, другое нават бонус, бо можна нагадваць аб радзіме ў самых далёкіх закутках свету.

Сцяг мой геніяльны!

Бел-чырвона-белы сцяг павінен вывучацца не толькі гісторыкамі ды геральдыстамі, але і дызайнерамі з брэнд-мэнэджарамі, бо гэта геніяльны прыклад вельмі гнуткай графічнай сістэмы, пры дапамозе якой можна што хочаш зрабіць беларускім. І прыгожым!

Светлым полем я нясу Агнявую паласу: Як маланка нада мной Зiхацiць над галавой

Сцяг мой вольны, Сцяг мой смелы, Сцяг мой бел-чырвона-белы.

— «Родны сцяг» С. Панізнік